Кийинки жылдан тарта МИКке мамлекеттик бюджеттен каржы бөлүнбөйт 

Кийинки жылдан тарта МИКке мамлекеттик бюджеттен каржы бөлүнбөйт. Бул тууралуу президент Садыр Жапаров бүгүн, 12-январда "Мурас" турак жай комплексинин батирлерин жарандарга тапшырып жатып билдирди.

Мамлекет башчынын айтымында, келечекте ипотекалык компания өз алдынча каржылоого өтүп, өлкөнүн турак жай фондун кеңейтүү пландалууда.

"Быйыл биз МИКке мамлекеттик бюджеттен акыркы жолу 500 миллион доллардын тегерегинде каражат бөлөбүз. Кийинки жылдан баштап ипотекалык компания бюджеттик каражат албайт. Өзүнүн 200 миллиард сомго чыгарып алган капиталы менен МИК 5-10 жыл эмес, 50-100 жыл бою элди турак үй менен камсыз кыла алат",- деди Садыр Жапаров.

Ошондой эле президент мамлекет мындан ары да заманбап, коопсуз, сапаттуу жана жеткиликтүү үйлөрдү курууга күч жумшай турганын баса белгиледи.