Иранда миңдеген адамдар бийликти колдоо акциясына чыгышты

Иранда он миңдеген адамдар өкмөттү колдоо үчүн өлкөдөгү шаарлардын көчөлөрүнө чыгышканын Associated Press агенттиги маалымдады.

Алар АКШ менен Израилге каршы ураандар менен чыгышкан. Акциянын катышуучуларынын көбү Ирандын желектерин жана жогорку лидер Али Хаменеинин сүрөттөрүн көтөрүп алышкан.

Буга чейин өлкө бийлиги тургундарды Иранды жана анын жетекчилигин колдоо боюнча демонстрацияларга катышууга чакырган.

Айта кетсек, Иранда нааразычылык акциялары декабрдын аягында улуттук валютанын кескин арзандашынан жана баалардын тез өсүшүнөн улам башталган. Нааразычылыкка чыккандар саясий режимди алмаштырууну жана 1979-жылы тактан кулатылган шахтын уулу Реза Пехлевинин бийликке келишин талап кылышууда. Time журналы кеминде 217 адам каза болгонун жазган. Ал эми Иран бийлиги башаламандыктар учурунда полициянын 15 кызматкери өлтүрүлгөнүн билдирген.

Тегеран нааразычылык акцияларын АКШ менен Израил уюштуруп жатат деп айыптоодо.