Иран бийлиги өлкөдөгү нааразычылык акциялары көзөмөлдө экенин билдирди

Иран бийлиги өлкө аймагында жүрүп жаткан нааразычылык акциялары толугу менен көзөмөлгө алынганын билдирди. Бул тууралуу Ирандын тышкы иштер министри Аббас Аракчи Sky News телеканалына маек берип жатып айткан.

Анын айтымында, өлкө боюнча өткөн нааразычылык акциялары учурда толук көзөмөлдө турат. Iran International басылмасы жазгандай, Аракчи Тегеран АКШ менен Израилдин Ирандагы акыркы "террордук аракеттерге" тиешеси бар экенин далилдеген көптөгөн материалдарга ээ.

"Бизде АКШ менен Израилдин Иранда акыркы күндөрү болгон террордук актыларга тиешеси бар экенин тастыктаган көп сандаган документтер жана далилдер бар",- деген ал.

ТИМ башчысы Батыш өлкөлөрүнүн өкмөттөрүн сындап, алар террорчуларды эмес, ирандык полицияны айыптап жатышканын белгиледи.

Эске салсак, Иранда декабрдын аягынан бери ири масштабдагы нааразычылык акциялары уланып келет. Акциянын катышуучулары саясий режимди алмаштырууну талап кылышууда. HRANA укук коргоо уюмунун маалыматы боюнча, кеминде 544 адам каза болгон. Иран бийлиги нааразычылык акцияларын уюштурууга АКШ менен Израилди айыптоодо.