Кытай АКШга эскертүү менен чыкты

Кытай АКШнын Арктикадагы өз кызыкчылыктарын илгерилетүү үчүн Кытайды же Орусияны шылтоо катары колдонушуна макул эместигин билдирди. Бул тууралуу Кытайдын Тышкы иштер министрлигинин расмий өкүлү Мао Нин дүйшөмбү күнү өткөн брифингде айтты. Бул тууралуу чет элдик басылмаларда жазылат.

Маалыматка ылайык, буга чейин Германиянын тышкы иштер министри Йоханн Вадефуль Исландияга жасаган сапарынын жүрүшүндө АКШнын президенти Дональд Трампка НАТО алкагында Кытай менен Орусиянын Арктикадагы "коркунучтарына" биргелешип каршы туруу сунушун билдирген. Ушул билдирүүгө комментарий берип жатып Мао Нин Арктика эл аралык коомчулуктун жалпы кызыкчылыктарына тиешелүү аймак экенин белгиледи.

Анын айтымында, Кытайдын Арктикадагы ишмердүүлүгү аймактагы тынчтыкты, туруктуулукту жана туруктуу өнүгүүнү бекемдөөгө багытталган жана эл аралык укуктун нормаларына толук шайкеш келет. Ошол эле учурда ал АКШнын Кытайды же Орусияны шылтоо кылып, өзүнүн стратегиялык кызыкчылыктарын алдыга жылдыруусуна Пекин макул эместигин баса белгиледи.

Буга чейин Ак үйдүн басма сөз катчысы Кэролайн Левитт Гренландиянын АКШга мүмкүн болгон кошулуусу Вашингтон үчүн Арктикада Орусия менен Кытайды ооздуктоо максатын көздөй турганын билдирген. Бирок бул пикирди Түндүк Европа өлкөлөрүнүн дипломаттары колдогон жок.

Financial Times басылмасы маалымдагандай, аталган аймактагы кырдаал менен тааныш булактарга таянган түндүк европалык дипломаттар Трамптын Орусиянын жана Кытайдын кемелери Гренландиянын айланасында жүрөт деген билдирүүлөрүн четке каккан. Алардын айтымында, акыркы жылдары Гренландиянын айланасында Орусия же Кытай кемелеринин, ошондой эле суу астындагы кайыктардын бар экенин көрсөткөн эч кандай далилдер катталган эмес.