№13 округда кайра шайлоо: Эки талапкер БШКга арыз берди

№13 көп мандаттуу шайлоо округундагы кайра шайлоого катышууну каалаган жарандардын арыздары 29-январга чейин кабыл алынат. Бул тууралуу БШКнын маалыматында айтылат.

Бүгүнкүгө карата Арстанбеков Акылбек Советбекович жана Маматаев Эркинбек Садирбекович шайлоого катышуу ниетин билдирип, БШКга арыз берди.

Эске салсак, БШК Жалал-Абад облусунун №13 округундагы шайлоонун жыйынтыгын жокко чыгарган. Мекеме аталган округда шайлоо бир ай ичинде кайра дайындаларын, мурдагы 14 талапкер кайра катыша албастыгын билдирген. Ал эми кайра шайлоо ушул жылдын 1-мартында өтөт.

№13 шайлоо округу Масы айылы. Шайлоочулардын саны 159 миң 906. Шайлоо округуна Базар-Коргон шаарындагы №2423, 2428, 2140, 2141 шайлоо тилкелери, Кеңеш, Арстанбап-Ата, Сайдыкум айыл аймактары кирди.