Түркияда Кыргыз жарандарын ишке орноштурган 4 компаниянын иши токтотулду

Эмгек министрлигине караштуу Жарандарды чет өлкөдө ишке орноштуруу борбору Түркияда кыргызстандыктарды ишке орноштуруудагы мыйзам бузууларга байланыштуу 4 компаниянын ишин токтотту.

Маалыматка ылайык, лицензия алуу учурунда ыйгарым укуктуу мамлекеттик органга ишенимсиз маалыматтарды камтыган документтер сунушталган. Тактап айтканда, Түркияда кабыл алуучу уюм (иш берүүчү/чет өлкөлүк ортомчу уюм) менен болгон иш жүзүндөгү кызматташтык жөнүндө маалымат көрсөтүлгөн эмес.

"Бул аракеттер жогоруда аталган жобонун 29-пунктунун 1-пунктчасында каралган талаптарды бузуу болуп саналат. Ага ылайык, жөнөтүүчү тарабынан уруксат алуу учурунда ишенимсиз маалыматтарды камтыган документтерди берүү фактылары аныкталган учурда уруксаттын колдонулушун токтотууга негиз болуп эсептелет",- деп жазылат маалыматта.

Аныкталган мыйзам бузууларды эске алуу менен төмөнкү компаниялардын иши токтотулду:

"Голден ворк & тревел"; "Айрис Тревел";
"Рамай-Саякат";
"Аска-Тревел".

Борбор уруксат алуу учурунда ишенимсиз маалыматтарды берүү, ошондой эле тышкы эмгек миграциясы чөйрөсүндөгү мыйзамдардын талаптарын сактабоо жоопкерчилик чараларын, анын ичинде уруксатты токтотууну же жокко чыгарууну шарттай турганын эскертет.