Тармактык комитет мамлекеттик сыйлыктар жөнүндө мыйзам долбоорун биринчи окууда колдоду

Жогорку Кеңештин тармактык комитети "Кыргыз Республикасынын мамлекеттик сыйлыктары, ардак наамдары жана мамлекеттик сый акылары жөнүндө" мыйзам долбоорун биринчи окууда жактырды.

Мыйзам долбоорун министрлер кабинети демилгелеген.

Юстиция министринин орун басары Кубан Казаков белгилегендей, мыйзам долбоору менен мамлекеттик сыйлыктардын 46 түрүнөн 20 түрүн калтыруу сунушталууда.

Алсак, мыйзам долбоору менен "Данакер", үч даражадагы "Эрдик" ордендерин, Кыргыз Республикасынын Ардак грамотасын, "Кыргыз Республикасынын эл акыны" наамын жана экинчи категориядагы "Эмгек сиңирген" деген ардак наамдарын Кыргыз Республикасынын мамлекеттик сыйлыктары жана ардак наамдары системинен алып салуу менен биргеликте Кыргыз Республикасынын Ардак грамотасын жана "Эмгек сиңирген" наамдарын министрлер кабинети тарабынан уюштуруу сунушталат.

Талкуу маалында депутат Гүлнара Акимбаева "Кыргыз Республикасынын эл акыны" наамын алып салуунун максатка ылайыктуулугуна көңүл бурса, эл өкүлү Марлен Маматалиев "Эмгек сиңирген" наамынын макамынын төмөндөшүнө токтолуп, ошону менен бирге "Кыргыз Республикасынын эл акыны" наамын алып салуу сунушун сындады.

Депутат Жанар Акаев да "Кыргыз Республикасынын эл акыны" наамын жокко чыгарууга болбой турганын айтып, акындарга "Кыргыз Республикасынын эл жазуучусу" наамын ыйгаруу туура келбестигин кошумчалады.

Комитет төрагасы Курманкул Зулушев бул маселеде айрым ардак наамдар менен сыйлыктарды алып салуунун ордуна бирдиктүү тартип жана ыкма керек экенин белгилеп, мамлекеттик сыйлыктардын учурдагы тутумун толугу менен кайра карап чыгып, жаңы системди түзүү керектигин билдирди.