Бишкекте "Тазалыктын" жаңы өндүрүштүк базасы курула баштады

Бүгүн, 13-январда Бишкек шаарынын мэри Айбек Жунушалиев "Тазалык" муниципалдык ишканасынын жаңы өндүрүштүк базасынын пайдубалына капсула салды.

Калаа бийлиги маалымдагандай, объекттин курулуш иштерин 2026-жылдын жай айларына чейин толук бүтүрүү пландалууда.

Жер тилкесинин жалпы аянты 4,13 гектарды, ал эми имараттардын жалпы аянты 11 500 чарчы метрди түзөт. Базанын аймагында өндүрүштүк жана оңдоо цехтери, атайын техникалар үчүн ангарлар, техникалык туз сактоочу кампа, таштанды жүктөө-өткөрүү станциясы, атайын техникалар үчүн токтотмо жайлар, ошондой эле ишкана кызматкерлери үчүн социалдык-тиричилик жана спорттук объекттер жайгашат.

"Жаңы объект ишкананын материалдык-техникалык базасын чыңдоого, эмгек коопсуздугун жогорулатууга, кызматкерлер үчүн ыңгайлуу жана коопсуз шарттарды түзүүгө, иштин натыйжалуулугун жана коммуналдык кызматтардын сапатын арттырууга мүмкүнчүлүк берет",- деп билдирди мекеме.