"Макулбу?" Курманкул Зулушев экономика министрин тартиптүү болууга чакырды

Жогорку Кеңештин Конституциялык мыйзамдар, мамлекеттик түзүлүш, жергиликтүү өз алдынча башкаруу комитетинин жыйынында депутат Курманкул Зулушев экономика министри Бакыт Сыдыковду тартипке чакырды.

Отурумда министр мамлекеттик жана муниципалдык кызматтарды көрсөтүүдөгү мыйзамга өзгөртүүлөрдү киргизүү долбоору боюнча баяндама жасап жаткан. Зулушевди анын эл өкүлдөрү тарабынан берилген суроолорго кол алдындагыларды жооп бердирип жатканы кыжырын келтирди.

"Баяндамачы өзгөрүп калган болсо, алдын ала билдирип, анан даярданып келсеңиз, макулбу? Анан, бул жерге туруп алып, залда отурган кызматкерлерди тургузуп, "сен жооп бер" деп башкарып албасаңыз, макулбу? Уруксат сураңыз, депутаттар макул болсо жооп беришет. Анда бардык министрликтерди алып келип, отургузуп алыңыз. Залда отургандар уруксаты жок сүйлөбөсөңүздөр", - деди Зулушев.