Шымкентте 21 жаштагы кыздын аянычтуу тагдыры: Аны жакындары акыркы сапарга узатышты

Казакстандын Шымкент шаарында 21 жаштагы Нурай аттуу кыздын мыкаачылык менен өлтүрүлүшү коомчулукта чоң резонанс жаратты. Каргашалуу окуядан бир нече күн өтүп, маркум кыз акыркы сапарга узатылды.

Маркумдун апасы жергиликтүү казак басылмаларынын бирине билдиргендей, Нурай күзүндө окууга кеткенден кийин аны өлтүрүүгө шектелип жаткан 28 жаштагы жаран бир нече жолу аңдып, үйүнүн айланасында күтүп жүргөн. Күндөрдүн биринде ал сүйлөшүп алууга кызды чакырып, күч колдонуп Алматыдан Шымкентке алып кеткен. Кийинчерээк туугандары полиция кызматкерлери менен биргеликте шектүүнүн үйүнөн Нурайды таап, алып кетишкен.

Бирок бул окуядан кийин да шектүү кызды тынч койбой, артынан аңдып, куугунтуктоону уланткан. Каргашалуу окуя 11-январь күнү кечинде болгон. Алдын ала маалыматтарга ылайык, жөө жүргүнчүлөр өтмөгүндө шектүү жаран кызды бир нече жолу бычак менен сайып, окуя болгон жерден качып кеткен. Көп өтпөй Нурай алган жаракаттарынан улам каза тапты.

Эки күндөн кийин шектүү шаардын сыртынан кармалып, учурда ал камакта. Укук коргоо органдары билдиргендей, бул иш боюнча тергөө амалдары улантылууда.