Казакстандык блогер Кайсар Камза эл аралык издөөдө. Эмне үчүн?

Белгилүү блогерге карата сот камак чарасын санкциялады

Казакстандык блогер Кайсар Камза эл аралык издөөдө жүргөн адамдардын тизмесине киргизилди. Сот ага карата бөгөт коюу чарасы катары камакка алуу чечимин сыртынан кабыл алды. Бул тууралуу Каржылык мониторинг агенттиги билдиргенин аталган өлкөнүн жергиликтүү басылмалары жазышууда.

Эмне үчүн издөө жарыяланды?

Тергөө версиясына ылайык, Камза мыйзамсыз онлайн-кумар оюндарынын ишмердүүлүгүнө көмөктөшкөн деп шектелүүдө. Ал социалдык тармактардагы таасирин пайдаланып, кумар оюн платформасын активдүү жайылткан.

Социалдык тармактардагы таасир

Блогер акыркы беш жылга жакын убакытта Instagram’дагы qais_arr аккаунту аркылуу ишмердүүлүк жүргүзүп, 2,4 миллион катталуучуга жеткен. Мындан тышкары, жүз миңдеген окурманы бар жабык Telegram-каналды да өзү башкарып турган.

Онлайн-казинонун жарнамасы

Маалыматка караганда, Камза видеолорунда онлайн-казино сайтына түз шилтемелерди, катталууга чакырыктарды жана жеке промокоддорду жайгаштырган. Бул промокоддор аркылуу колдонуучуларга бонустар сунушталып, аудитория кумар оюндарына тартылган.

Кирешени жашыруу ыкмасы

Тергөөчүлөрдүн билдирүүсүндө, блогер жарнамадан түшкөн кирешелерди криптовалюта капчыгы аркылуу алган. Интернет-казино уюштуруучуларынан түшкөн каражаттар дал ушул капчыкка которулуп турган.

Криптоактивдери чектелди

Соттун санкциясы менен 182 736 USDTден ашуун криптоактивдер камакка алынды. Бул каражаттар тергөө ишинин алкагында текшерилүүдө.

Блогер азыр кайда?

Учурда Кайсар Камзанын жүргөн жери белгисиз. Каржылык мониторинг агенттиги жарандарды изделип жаткан адам тууралуу кандайдыр бир маалымат болсо, укук коргоо органдарына билдирүүгө чакырды.

Мурдагы чуулгандуу учурлар

Камза буга чейин да мыйзамсыз жарнамалар жана онлайн-казинону жайылтуу боюнча жоопкерчиликке тартылып, ири өлчөмдөгү айып пул төлөгөн. Ошого карабастан, анын контенти олуттуу өзгөргөн эмес.

Коомдук резонанс жараткан видео

Коомчулукта кеңири талкуу жараткан учурлардын бири - блогердин Индияда тартылган видеосу. Анда анын агрессивдүү жүрүм-туруму жана одоно сөздөрү сынга алынган. Расмий даттануулар болбосо да, окуя коомчулуктун катуу реакциясын жараткан.

Блогердин жообу

Кайсар Камза изделип жатканы тууралуу маалыматка жооп кайтарып, өзүнүн Instagram баракчасында комментарий жарыялаган.

"Мен азыр окуп жаткандарга таң калып турам. Кайсы кылмышты жасап койдум? Кимге ушунча тоскоол болдум? Мени мамлекет издеп жаткандай, мен миллиарддарды уурдап качып кеткен адамдай көрсөтүп жатышат. Чындыгында андай эмес. Баары жакшы".