Депутат Бекешев: "Ботаникалык бакка футбол аянтынын кереги жок" 

Жогорку Кеңештин депутаты Дастан Бекешев ботаникалык бакка футбол аянтчасынын курулушуна каршы экенин парламенттин 14-январдагы жыйынында билдирди.

Эл өкүлү Кыргызстандагы ботаникалык бактар Бишкекте жана Нарында гана бар экенин эске салды.

"Ботаникалык бак илимий ишмердүүлүк, өсүмдүктөрдү анын ичинде эндемикалык өсүмдүктөрдү өнүктүрүү үчүн түзүлгөн. Башка өлкөлөрдө аны өнүктүрүп, өсүмдүктөрдүн санын көбөйтүп жатышат. Ал эми бизде ботаникалык бакта футбол аянтчасын курууну чечишиптир. Тиешелүү мыйзамда бак биологиялык ар түрдүүлүк жана илимий ишмердүүлүк үчүн түзүлгөнү так жазылып турат.

Футболду өнүктүрүүгө каршы эмесмин. Бирок эч бир футболчу футбол аянтчысын ботаникалык бакта куруп берүүнү суранбаса керек. Ал жер бул үчүн эмес. Келгиле, футбол аянтчасын ботаникалык бактан бөлөбүз. Ал бак бир гана Бишкекке эле эмес өлкө үчүн керек",- деген депутат спорттук курулуштарга башка аймактан жер кароого чакырды.

Эл өкүлү президенттин жана өкмөттүн Жогорку Кеңештеги өкүлү Алмасбек Абытовго кайрылып, бул маселеге көңүл бурууну суранды.