Ирандын мурдагы императрицасы армияга кайрылды

Ирандын мурдагы императрицасы, 1979-жылы тактан кулатылган шах Мохаммед Реза Пехлевинин жубайы Фарах Пехлеви ирандык армияны өлкөдөгү нааразычылык акцияларына кошулууга чакырды. Анын кайрылуусу X социалдык тармагында жарыяланган.

"Иран тарыхындагы бул бурулуш учурларда мен кайрадан Ирандын куралдуу күчтөрүнө кайрылам. Эч бир режимдин сакталып калышы же кандайдыр бир кызыкчылыктар мекендештериңердин канын төгүүгө татыктуу эмес. Өтө кеч болуп кете электе, бир туугандарыңарга жана эже-карындаштарыңарга кошулгула",- деп жазган Фарах Пехлеви.

Ал ошондой эле нааразычылык акциялары учурунда жакындарынан айрылган бардык мекендештерине көңүл айтып, Ирандагы митингдерге чыккан жарандардын кайраттуулугу, мекенчилдиги жана өз жанын аябагандыгы дүйнө жүзү тарабынан урматтоого татыктуу экенин белгиледи.

Буга чейин АКШнын президенти Дональд Трамп Иран бийлигине нааразы болгон жарандарды мамлекеттик мекемелерди басып алууга чакырган. Ал Ирандын расмий өкүлдөрү менен бардык жолугушууларды токтотконун жана Тегеран менен диалог жүргүзүүдөн баш тартканын билдирген.