Өлкөдө блогерлерге салык киргизүү мүмкүнчүлүгү каралууда

Кыргызстанда 10 миңден ашык жазылуучусу бар блогерлерге салык төлөө милдетин киргизүү мүмкүнчүлүгү каралууда. Бул тууралуу журналист Эламан Карымшаков социалдык тармактарга жазып, маданият, маалымат, спорт жана жаштар саясаты министринин орун басары Марат Тагаевдин курултай делегатына жөнөткөн жооп катынын скриншотун бөлүштү.

Катта көрсөтүлгөндөй, министрлик учурда "Блогерлер жөнүндө" мыйзам долбоорун даярдап жатат. Анын алкагында блогерлердин ишмердүүлүгүнө мамлекеттик көзөмөл орнотулары пландалууда. Ошондой эле 10 миңден ашык жазылуучусу бар блогерлерге салык төлөө милдети киргизилиши мүмкүн экени белгиленген.

Ал эми Маданият, маалымат, спорт жана жаштар саясаты министрлигинен SUPER.KG порталына билдиришкендей, учурда мыйзам долбоору даярдалып жатат.

"Азырынча блогерлер канча катталуучудан кийин салыктын алкагына кирери так эмес. Ошондуктан 10 миң деп айтуу эрте. Мыйзам долбоору толук даяр болсо маалымат берилет",- деп кошумчалашты министрликтен.