Илим министрлиги сабактан калган студенттерден акчалай айып пул алууну токтотууну сунуштады 

Илим министрлиги сабактан калган студенттерден акчалай айып пул алууну токтотууну сунуш кылды. Бул тууралуу министрликтин басма сөз кызматы кабарлады.

Маалыматка ылайык, мындай сунуш менчик формасына карабастан өлкөдөгү бардык жогорку жана орто билим берүү уюмдарына тиешелүү.

"Сунуш билим алуучулардын укуктарын камсыз кылуу, окуу тартибине карата адилеттүү жана бирдиктүү мамилелерди калыптандыруу, ошондой эле билим берүү чөйрөсүндө негизсиз каржылык жаза колдонууга жол бербөө максатында берилди. Министрлик колдонуудагы мыйзамдарга ылайык, акчалай санкцияларга байланышпаган академиялык мүнөздөгү альтернативдүү чараларды колдонууну сунуштайт",- деп жазылган маалыматта.

Белгилей кетсек, буга чейин Жогорку Кеңештин депутаты Дастан Бекешев окуу жайларда студенттер сабакка келбей калган күндөрү үчүн акча төлөп жатышканын айткан эле.