Өлкөдө унаа сатуудагы салыктык жеңилдиктер маалымдалды

Салык кодексине жеңил автомототранспорт каражаттарын сатууда убактылуу салыктык жеңилдиктерди караган өзгөртүүлөр киргизилди. Бул тууралуу бүгүн, 14-январда Салык кызматынын басма сөз кызматы билдирди.

Маалым болгондой, бул өзгөртүүлөр 31-декабрдагы президент Садыр Жапаров кол койгон мыйзамга ылайык киргизилди. Алар 2029-жылдын 1-январына чейин күчүндө болот жана ТЭИ ТН 8703 товар позициясына кирген автомототранспорт каражаттарына тиешелүү.

Тактап айтканда, төмөнкү салык жеңилдиктери каралган:

– жеке жактар тарабынан (катталган жеке ишкерлер жана юридикалык жактардан тышкары) жеңил автомототранспорт каражаттарын сатуу системалуу негизде жүргүзүлгөн ишмердүүлүк деп эсептелбейт. Анын ичинде календардык жыл ичинде экиден көп унаа сатылган учурда;

– жеке жактар тарабынан жеңил автомототранспорт каражаттарын сатууда киреше салыгы салынбайт;

– жеңил автомототранспорт каражаттарын сатууда түшкөн кирешелер пайда салыгынан бошотулат;

– жеңил автомототранспорт каражаттарын жеткирүү кошумча нарк салыгынан бошотулат;

– жеңил автомототранспорт каражаттарын сатуудан алынуучу салыктан бошотулат.

- жеке жактар (жеке ишкерлерден тышкары) 2026-жылдын 1-январына чейин унааларды сатуудан алган кирешелери боюнча салык, туум жана санкциялардан бошотулат.

Кабыл алынган ченемдер калкка жана ишкердик субъекттерине салыктык жүктү азайтууга, ошондой эле автотранспорт каражаттары рыногундагы операциялардын ачыктыгын стимулдаштырууга багытталганы маалыматта кошумчаланды.