Даниянын ТИМи Трамптын Гренландияны алуу мүмкүнчүлүгүн баалады

АКШнын лидери Дональд Трамп Гренландияны ала албайт, анткени гренланд эли эл аралык укукка ылайык өз тагдырын өзү аныктоого укуктуу. Бул тууралуу Даниянын тышкы иштер министри Ларс Лёкке Расмуссен чет элдик басылмаларга билдирген.

"Трамп Гренландияны ала албайт. Анткени Гренландия – бул Гренландия, ал эми гренланд эли эл аралык укуктун көз карашынан алганда да өз алдынча эл болуп саналат. Ал аралды ала албайт. Ошондуктан мен азыр бул жерде туруп алып, ага кантип бир нерсени тартып алса болору же эмнени кылбашы керектиги боюнча кеңеш бербешим керек", - деди дипломат.

Даниянын тышкы иштер министринин бул позициясын коргоо министри Троэльс Лунд Поульсен да колдоп, Дональд Трамп АКШга Гренландияны кошуп албашы керектигин белгилеген.

Эскерте кетсек, январь айында Дональд Трамп Даниянын премьер-министри Метте Фредериксенге телефон чалып, Гренландияны берүүнү талап кылганы маалым болгон. Булактардын айтымында, эки лидердин сүйлөшүүсү "абдан начар" өткөн, анткени америкалык лидер агрессивдүү мамиле жасап, конфронтацияга барган. Ошондой эле Трамп Дания тарап сунуштаган кызматташтык варианттарын четке какканы, аны "аралды АКШга өткөрүү гана кызыктырганы" айтылган.