НАТОнун үч өлкөсү Гренландияга аскерлерин жөнөтөт

Германия, Швеция жана Норвегиянын аскер кызматкерлери АКШнын Гренландия аралына карата аймактык дооматтары күчөп турган шартта, 15–17-январь күндөрү чалгындоо миссиясы менен барышат. Бул тууралуу чет элдик басылмалар жазышууда.

Берлиндин маалыматына караганда, миссиянын негизги максаты — аймактагы коопсуздукту камсыздоонун мүмкүнчүлүктөрүн изилдөө. Германиянын Коргоо министрлиги бул иш-чара Даниянын чакыруусу менен өтөрүн белгиледи.

"Максат – Данияны региондогу коопсуздукту камсыздоодо, айрыкча деңиз байкоосу жаатында аскердик колдоонун мүмкүн болгон жолдорун изилдөө", — деп түшүндүрдү ведомство.

Миссияга Германиядан 13 аскер кызматкери катышат. "Норвегия эки жоокер жөнөтөт", - деп билдирди өлкөнүн коргоо министри Торе Сандвик. Ал эми Швециядан Гренландияга бир нече офицер барары маалым болду. Бул тууралуу Швециянын премьер-министри Ульф Кристерссон билдирди.

Бул миссияны Дания көзөмөлдөйт жана операция АКШ менен координациясыз жүргүзүлүүдө. Бул жагдай Вашингтондун акыркы күндөрү Гренландияга карата аймактык дооматтарын кайрадан ачык айта баштаган фонунда өзгөчө көңүл бурууда.

АКШнын президенти Дональд Трамп Гренландиянын премьер-министри Йенс-Фредерик Нильсендин арал Даниянын курамында калууну каалай турганы тууралуу билдирүүсүнө да комментарий берди. Трамп анын ким экенин билбесин айтып, "бирок бул анын өзү үчүн чоң маселе болот" деп кошумчалаган.

Буга чейин Дания парламентинин депутаты Копенгаген Гренландияны ядролук курал колдонуу коркунучу жаралган күндө да бербей турганын билдирген.