Депутат Дастан Бекешев: "Айдоочулук күбөлүктү алуу үчүн 10 ай өтө көп" (видео)

10 ай айдоочулук күбөлүктү алуу мөөнөтү көптүк кыларын бүгүн, 15-январда депутат Дастан Бекешев Жогорку Кеңештин жыйынында билдирди.

"Японияда окутуу 3 айга созулат, ошондой эле АКШ жана Грузияда да мөөнөттөр анчалык узун эмес. Биз ушундай кылсак жаштар Өзбекстанга же Казакстанда окуп келишет. Биз, тескерисинче, башка өлкөлөрдүн туризмин өнүктүрөбүз", - деди депутат.

Анын бул билдирүүсүнө Мамлекеттик транспорттук каражаттарды каттоо жана айдоочулук курам боюнча борбордун директору Тынычбек Саидов жооп берди.

"Билим берүү министрлиги "В" жана "С" категорияларындагы айдоочулук күбөлүктөрүн алуу стандарттарын бекитти. Анын алкагында "В" категориясы боюнча окутуу 10 ай, С категориясы боюнча 12 ай деп белгиленген. Азыр теориялык жана практикалык сааттардын тартиби да бекитилүүдө", - деп билдирди.