Пакистанда Кыргызстандын маданият күндөрүн уюштуруу маселелери талкууланды

13-январда Кыргызстандын Пакистандагы элчиси Кылычбек Султан Пакистандын Улуттук мурас жана маданият боюнча министри Аурангзеб Хан Хичи менен жолугушуу өткөрдү. Бул тууралуу бүгүн, 15-январда Тышкы иштер министрлигинен маалымдашты.

Жолугушуунун жүрүшүндө тараптар эки өлкөнүн ортосундагы маданий-гуманитардык кызматташтыктын учурдагы абалы жана мындан аркы өнүгүү келечеги тууралуу пикир алмашышты. Айрыкча Кыргызстандын Пакистандагы маданият күндөрүн уюштуруунун практикалык маселелерине өзгөчө көңүл бурулду.

Жолугушуунун жыйынтыгында аталган маданий иш-чараны даярдоо жана өткөрүү процессин координациялоо максатында биргелешкен жумушчу топ түзүү тууралуу макулдашылды. Мындан тышкары, тараптар Нооруз майрамын белгилөөнү камтыган биргелешкен маданий иш-чаралардын программасын иштеп чыгуу ниетин билдиришти.

Тараптар маданият күндөрүн өткөрүү эки өлкөнүн ортосундагы достук мамилелерди бекемдөөгө маанилүү кадам болорун белгилешти.