Адылбек Касымалиев 2025-жылы чет өлкөгө 19 сапар жасаган

2025-жылы Министрлер кабинетинин төрагасы Адылбек Касымалиев чет өлкөгө жалпысынан 19 сапар жасаган. Бул тууралуу тышкы иштер министри Жээнбек Кулубаев 2025-жылдын жыйынтыгы боюнча өткөн маалымат жыйынында билдирди.

Министрдин маалыматына ылайык, аталган сапарлардын үчөө расмий мүнөздө болсо, 16сы жумушчу сапар болгон. Бул визиттер Кыргызстандын тышкы саясатындагы жана экономикалык дипломатиядагы активдүүлүктү чагылдырды.

Жээнбек Кулубаев 2025-жыл регионалдык жана глобалдык күн тартибиндеги татаалдыктарга карабастан, экономикалык дипломатиянын жогорку темпин сактап калууга мүмкүнчүлүк болгонун белгиледи.

"Бул сапарлардын алкагында ондон ашык документке кол коюлуп, бир нече узак мөөнөттүү “жол карталары” иштелип чыкты", — деди министр.

Аталган чет өлкөлүк сапарлар Кыргызстандын эл аралык кызматташтыгын кеңейтүүгө, соода-экономикалык байланыштарды чыңдоого жана инвестициялык мүмкүнчүлүктөрдү арттырууга багытталган.