Колумбиянын президентинин Вашингтонго бара турчу убактысы айтылды

Колумбиянын президенти Густаво Петро 3-февралда Вашингтонго АКШнын президенти Дональд Трамп менен эки тараптуу мамилелерди талкуулоо үчүн барат. Бул тууралуу чет элдик басылмалар жазышты.

Петро өзүнүн пландарын өкмөттүн жыйынында жарыялаган. Ал жолугушуу өткөн аптада эки лидердин телефон аркылуу сүйлөшүүсүнүн аркасында мүмкүн болгонун айткан. Колумбия президенти Трамп менен эки өлкөнүн ортосундагы мамилелердеги чыңалууларды, айрыкча баңгизаттарды мыйзамсыз жүгүртүүгө байланыштуу маселелерди талкуулай турганын белгилеген.

Петро мурда Трамп аны Ак үйдө жолугушууга чакырганын билдирген, бирок ал учурда датасы айтылган эмес.

Трамп менен Петронун ортосундагы мамилелер акыркы айларда чыңалган. Колумбиянын лидери америкалык кесиптешинин аракеттерин көп сындап келген. Трамп өз кезегинде Петрону Колумбиядан АКШга баңгизаттарды мыйзамсыз жүгүртүүгө иш жүзүндө катышкан деп айыптаган.

Жакында эле Венесуэланын президенти Николас Мадуронун Каракаста камакка алынышынан кийин Трамп Колумбиянын президенти дагы этият болушу керектигин эскерткен.