Франция Гренландиядагы Даниянын аскердик машыгууларына кошулат

Франциянын аскер күчтөрү Гренландияда Дания тарабынан уюштурулган машыгууларга катышат.

"Даниянын өтүнүчү боюнча мен Франциянын Гренландияда Дания тарабынан уюштурулган биргелешкен машыгууларга, тагыраагы, "Арктикалык бекемдик" операциясына катышуусун чечтим", - деп жазды Франциянын президенти Эммануэль Макрон Х социалдык тармактагы баракчасына.

Ал аскерлердин алгачкы топтору машыгуу өтүүчү жерге бара жатканын белгиледи.

Мурда Швеция менен Норвегия өздөрүнүн куралдуу күчтөрүнүн өкүлдөрү Гренландиядагы машыгууларга катышарын жарыялашкан. Өткөн шаршембиде Дания Гренландияга аскерлерин жайгаштыра баштаганы, андан кийин НАТОнун союздаш күчтөрү аралга кайра жайгаштырылары күтүлүп жатканы кабарланган.

АКШнын президенти Дональд Трамп Вашингтон Гренландияны кандайдыр бир жол менен көзөмөлдөй турганын билдирген. Ак үйдүн башчысы аралды Кошмо Штаттардын курамына кошуш керек деген пикирин айтып келет.