Спортчу Денис Петрашов Pro Swim Series эл аралык турниринде күмүш медаль жеңди

Кыргызстандык сууда сүзүүчү Денис Петрашов АКШнын Остин шаарында өтүп жаткан Pro Swim Series эл аралык турниринде күмүш медаль багындырды.

Сүзүүчү 100 метр брасс боюнча мелдеште 14-январда башталган жарыштарда алдын ала беттештерде экинчи көрсөткүчтү көрсөтүп, финалга ишенимдүү чыкты.

Финалдык беттеш бүгүн, 15-январда эртең менен болуп, Петрашов 59,55 секунд менен экинчи орунду ээлеп, күмүш медалга ээ болду.

Жарышта биринчи орунду АКШдан келген Ван Матиас багындырып, 59,45 секунд көрсөткөн.

Маалыматка караганда, учурдагы Pro Swim Series этабында Денис Петрашов 50 жана 200 метр брасс дистанцияларында дагы күч сынашат жана медалдар үчүн атаандаштык улантылат.