Чүйдө адам өлтүрүүгө шектүү жаран кармалды

Чүй облустук милициясы 16-январда адам өлтүрүүгө шектүү жаран кармалып, убактылуу кармоо жайына киргизилгенин билдирди.

Такталгандай, 15-январда саат 14:43тө милицияга Таш-Дөбө айылындагы жашаган жеринен 52 жаштагы Ш.А.нын денеси табылганы тууралуу билдирүү түшкөн.

14-январда маркум өзүнүн үйүндө 1971-жылы туулган П.С., 1993-жылы туулган Т.У. жана З. аттуу жарандар менен бирге спирт ичимдиктерин ичкени аныкталган. Ортодо чыккан чыр-чатактан маркум жана П.С. аттуу жарандар Т.У. жана З. тарабынан ар кандай жаракаттарды алышкан.

Маркумдун сөөгү дене жаракаттарынын оордугун аныктоо үчүн өлүкканага жөнөтүлүп, ал эми П.С. ар кандай жаракаттар менен Бишкек шаарынын №4 шаардык клиникалык ооруканасына жаткырылган.

Аталган факт боюнча Кылмыш-жаза кодексинин 122-беренеси (Адам өлтүрүү) менен кылмыш иши козголгон. Шектүү катары 1993-жылы туулган Т.У. аттуу жаран кармалып, убактылуу кармоочу жайга киргизилген.

Бардык зарыл болгон соттук-укуктук экспертизалар дайындалып, тергөө иштери улантылууда.