Бишкекте күчтүү таасир этүүчү дары-дармектерди сатып жүргөн аял кармалды

Бишкекте күчтүү таасир этүүчү дары-дармектерди мыйзамсыз сатып жүргөн аял кармалды. Бул тууралуу бүгүн, 16-январда шаардык милициянын маалымат кызматы билдирди.

Маалым болгондой, Октябрь райондук милициясына Н. аттуу жаран дарыларды сатып жүргөндүгү боюнча маалымат түшкөн. Аталган факт боюнча Кылмыш-жаза кодексинин 282 (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) беренеси боюнча кылмыш иши козголду.

Натыйжада Арстанбек көчөсүндө 24 жаштагы жаран жогоруда аты аталган аялдан дары-дармек алганын айтып, милицияга үч таблетка ыктыярдуу түрдө өткөрүп берген.

Ыкчам иш аракеттердин натыйжасында Баңгизаттардын мыйзамсыз жүгүртүлүшүнө каршы күрөшүү кызматынын ыкчам кызматкерлери тарабынан 1971-жылы туулган Н.С. аттуу жаран кармалды. Анын жашаган жеринде тинтүү жүргүзүлүп, 132 даана эки түрдүү дары табылды.

Учурда ал убактылуу кармоочу жайга киргизилип, тергөө иштери уланууда.