Казакстанда атасын ур-токмокко алган балага сот өкүм чыгарды 

Казакстанда атасын ур-токмокко алган балага райондук сот өкүм чыгарды. Бул тууралуу Казакстандын жергиликтүү басылмалары жазышты.

Андагы маалыматта, айыпталуучуга "Адамды атайылап жардамсыз абалда кыйноо" жана "Алсыз адамдын денесине оор залал келтирүү" деген эки берене боюнча айып тагылган. Мындан улам сот аны 5 жылга эркинен ажыратуу өкүмүн чыгарган.

Соттун басма сөз кызматы чечим чыгарууда айыпталуучунун мурда соттолбогону, күнөөсүн мойнуна алганы жана жашы жете элек балдары бар экени эске алынганын белгилеген.

Айта кетсек, бул иш коомчулукта чоң резонанс жараткан. Былтыр сентябрь айында социалдык тармактарда окуянын видеосу тараган. Кадрларда кары адамдын кандуу бетинин көрүнүшү бар. Ал өз алдынча тура албай калганда уулу аялын чакырып, экөө аны үйгө киргизген.

Андан кийин белгилүү болгондой, атасы көз жумган. Полиция жубайлар боюнча кылмыш ишин козгогон, бирок аялына карата козголгон иш далилдин жоктугунан токтотулган.