Дайырбек Орунбеков айдоочулук күбөлүк боюнча кошумча маалымат берди

Эски үлгүдөгү күбөлүктөрдү акысыз алмаштырууга 1 ай убакыт берилди, эгер ал убакта жетишпей калгандар болсо кошумча убакыт берилет. Бул тууралуу президенттин маалыматтык саясат бөлүмүнүн башчысы Дайырбек Орунбеков социалдык тармактагы баракчасынан билдирди.

Маалыматка ылайык, эски үлгүдөгү айдоочулук күбөлүктөрдүн жасалма түрү убагында кеңири тарап кеткен. "Азыр деле Москвада жасап алып сатып жүргөндөр тууралуу маалыматтар бар. Көпчүлүгүнүн сүрөтү, жазуулары деле өчүп кетиптир",- деп билдирди ал.

Анын айтымында, эски күбөлүктү башка өлкөлөр дагы тааныбайт. Жаңы үлгүдөгү айдоочулук күбөлүктү бир нече өлкө тааныйт, колдонуп жүрө берүүгө мүмкүн.

Мындан тышкары, жаңы берилген күбөлүктөр санариптештирилет, муну менен жасалма күбөлүк даярдоого мүмкүнчүлүк берилбейт. Ошондой эле толук алмаштыруу иштери аяктагандан кийин, мурдагы эски айдоочулук күбөлүктөр жараксыз деп табылат.