Таласта курулуш ченемдерин сактабаган компанияга айып пул салынды

Талас районуна караштуу Шумкар-Уя айыл өкмөтүнүн Чоң-Токой айылындагы таза суу системинин курулушун долбоорлоодо, курууда техникалык регламенттердин, курулуш ченемдеринин, эрежелеринин жана курулуш стандарттарынын сакталбагандыгы аныкталды. Бул боюнча Курулуш министрлиги маалымдайт.

Кабарга ылайык, ал жерде башка ченемдик укуктук актылардын талаптары да бузулганы маалым болду.

Натыйжада, текшерүү актысы түзүлүп, курулуш иштерин аткарып жаткан “НТ Групп-строй” ЖЧКсына карата эки жүз миң сом эсебинде айып пул салынып, бузуулардын бирдиктүү реестрине киргизилди.

Министрлик курулуш тармагында иш алып барган бардык уюмдарды жана жеке жактарды өлкө мыйзамдарына ылайык курулуш талаптарын, ченемдерин жана эрежелерин так сактоого чакырат.