"Нобель" комитети Трампка өткөрүлүп берилген сыйлыкка байланыштуу комментарий берди

Норвегиялык "Нобель" комитети Венесуэла оппозициясынын лидери Мария Корина Мачадо тынчтык медалын АКШ президенти Дональд Трампка өткөрүп бергенине байланыштуу комментарий берди.

Комитеттин Х социалдык тармагындагы билдирүүсүндө мындай жагдайга жол берилбеши керектиги белгиленди.

"Нобель" сыйлыгы жарыялангандан кийин аны жокко чыгарууга, бөлүштүрүүгө же башка адамдарга өткөрүп берүүгө болбойт. Бул чечим акыркы болуп саналат жана түбөлүккө күчүндө калат. Медалдын ээси өзгөрүшү мүмкүн, бирок "Нобель" тынчтык сыйлыгынын лауреатынын ысымы өзгөрбөйт",- деп айтылат маалыматта.

Буга чейин Мария Корина Мачадо АКШ президенти Дональд Трампка өзүнүн медалын тапшырганын билдирген. Алар Венесуэладагы кырдаалды талкуулоо үчүн Ак үйдө жолугушуп, сүйлөшүү эки сааттан ашык убакытка созулган.

Белгилей кетсек, 2025-жылдагы "Нобель" тынчтык сыйлыгы Мария Корина Мачадого Венесуэла элинин демократиялык укуктарын илгерилетүү боюнча тынымсыз эмгеги үчүн ыйгарылган. Ал эми Дональд Трамп буга чейин бир нече жолу өзүнүн тынчтыкты орнотуудагы аракеттери үчүн "Нобель" сыйлыгына татыктуу экенин билдирип келген.