"Бейиш: Апама кат" тасмасынын Павел Майков катышкан тизери жарыкка чыкты (видео)

Режиссёр Руслан Акун тарткан "Бейиш - эненин таманында" тасмасынын уландысы болгон "Бейиш: Апама кат" көркөм тасмасынын тизери жарыкка чыкты.

Тасмага орусиялык театр жана кино актёру Павел Майков тартылган. Ал көпчүлүккө "Бригада" сериалындагы Пчёланын образы менен таанымал. Анын тасмага катышуусу актёрдук курамды кеңейтип, фильмге кеңири аудиториянын көңүлүн бурду.

"Бейиш: Апама кат" тасмасы биринчи бөлүктөгү драмалык окуяны улантып, энелик мээрим, руханий баалуулуктар, чоңдордун жоопкерчилиги жана адамдык ыраазычылык сыяктуу темаларды кайрадан козгойт. Картина эл аралык кинофестивалдарда таанылган жана заманбап Кыргыз киносунда өз ордун тапкан режиссёр Руслан Акундун жетекчилиги астында жаралууда.

Фильмдин бет ачары 2026-жылдын 29-январында Кыргызстандын бардык кинотеатрларында өтөт.

Тасманы "Egemen" жана "AZO Originals" студиялары тартууда. Улуттук прокаттан кийин эл аралык көрсөтүүлөр да пландалууда.