Трамп Газа тилкеси үчүн Тынчтык кеңеши түзүлгөнүн жарыялады

АКШнын президенти Дональд Трамп Вашингтондун планына ылайык, Газа тилкесин кайра курууга жетекчилик кыла турган Тынчтык кеңешинин түзүлгөнүн жарыялады.

"Тынчтык кеңешинин түзүлгөнүн жарыялоо мен үчүн чоң сыймык. Мүчөлүк жакында жарыяланат. Мен бул эң улуу жана эң абройлуу кеңеш деп ишенимдүү түрдө айта алам",- деп жазган америкалык лидер Truth Social социалдык тармагында.

Буга чейин The Telegraph гезити маалымат булактарга шилтеме берип, Трамп Улуу Британиянын премьер-министри Кир Стармерге жана башка бир нече союздаш өлкөлөрдүн лидерлерине Газа тилкесин башкара турган Тынчтык кеңешиндеги орундарды сунушташы мүмкүн экенин билдирген.

Басылманын маалыматы боюнча, Улуу Британиянын, Германиянын, Франциянын, Италиянын, Сауд Арабиясынын, Катардын, Египеттин жана Түркиянын лидерлери жакынкы күндөрү кеңешке кошулушу күтүлүүдө.

2025-жылдын 9-октябрынын түнүндө АКШнын президенти Израил жана ХАМАС бийликтери Вашингтондун Газа жаңжалын чечүү боюнча сунушталган планынын биринчи этабына макул болгонун жарыялаган. Палестиналык туткундардын ордуна израилдик барымтадагыларды бошотуу жана израилдик аскерлердин жарым-жартылай чыгарылышы пландын биринчи этабын түзгөн.

Экинчи этап Газаны согуштан кийинки башкарууга жана бул үчүн зарыл болгон механизмдерди түзүүгө тиешелүү.

Өткөн жылы ноябрда БУУнун Коопсуздук кеңеши АКШнын планын колдогон жана анын экинчи этабын алдыга жылдырган резолюция кабыл алган, анда ХАМАСты куралсыздандыруу жана израилдик аскерлерди Газа тилкесинен чыгаруу талап кылынган.