Муунтуп... Жигитинин үстүнөн арыз жазган кыз окуяны видеого тартып алган

Жигити тарабынан кол салуу болгонун айтып, милицияга арыз жазган кыз окуяны видео тартып алган. Бишкектин Свердлов райондук милициясы видеону жарыялады. Анда жигит кызды муунтуп жатканын көрүүгө болот.

Буга чейин райондук милиция окуя 15-январда болгонун, анда шектүү жабырлануучуну Жумабек көчөсүнөн күч колдонуп, унаага салып, белгисиз тарапка алып барып, ал жерден өлтүрүүгө аракет кылганын билдирген.

Факт боюнча Кылмыш-жаза кодексинин "Адам өлтүрүүгө аракет кылуу" беренеси менен кылмыш иши козголгон. Колго түшкөн шектүү жигит убактылуу кармоочу жайга киргизилген. Учурда тергөө иштери уланууда.

Айрым жергиликтүү басылмалар маалымат булактарына шилтеме жасап, алар кыз-жигит болушканын, уруша кетишкендиктен жигит аны өлтүрүүгө аракет жасаганын, бирок кыз качып кутулганын жазышты. Шектүү өз жанын кыюуга аракет кылып жатканда кармалган.