Трамп Гренландияга байланыштуу бир катар Европа өлкөлөрүнө тарифтерди киргизди

АКШнын президенти Дональд Трамп Гренландиядагы кырдаалга байланыштуу февраль айынан баштап бир катар Европа өлкөлөрүнө тарифтерди киргизерин жарыялады.

"2026-жылдын 1-февралынан баштап бул өлкөлөрдүн баары – Дания, Норвегия, Швеция, Франция, Германия, Улуу Британия, Нидерланд жана Финляндия АКШга жөнөтүлгөн бардык товарларга 10 пайыз тариф төлөшөт", - деп жазган ал Truth Social социалдык тармагында.

Трамп 2026-жылдын 1-июнунан баштап бул өлкөлөргө тарифтер 25 пайызга чейин көтөрүлөрүн жана Вашингтон Гренландияны толугу менен сатып алуу боюнча келишимге жетишилгенге чейин күчүндө каларын кошумчалаган.

Америкалык лидер жогоруда айтылган өлкөлөрдүн Гренландияга күчтөрүн жайгаштыруусуна нааразы экенин белгилеген. Ал ошондой эле эгер АКШ Гренландияны албаса, аралды Орусия же Кытай көзөмөлдөйт деген пикирин кайталаган.

Буга чейин Трамп Вашингтондун Гренландияны аннексиялоо боюнча пландарына каршы болгон өлкөлөргө товар тарифтерин киргизерин эскерткен.