Тажикстан Ооганстан менен чектеш жерде төрт согушкерди жок кылганын билдирди

Тажикстандын Улуттук коопсуздук боюнча мамлекеттик комитетинин чек арачылары 18-январда террористтик уюмдун төрт мүчөсүн Ооганстан тараптан мыйзамсыз өтүүгө аракет кылганда жок кылган. Окуя Шамсиддин Шохин районундагы өткөрмө жайда болгонун чет элдик басылмалар жазышууда.

Согушкерлер чек арачылардын тапшырмасын аткарбай, куралдуу каршылык көрсөтүшкөн, натыйжада баары жок кылынды. Тажик чек арачыларынын арасында жоготуулар тууралуу маалымат берилген жок. Окуя болгон жерде террорчуларга таандык делген курал-жарактар, 3 телефон, рация жана кайык табылган. Бул окуялар боюнча кылмыш иши козголду.

Учурда чек арадагы абал көзөмөлдө жана өлкөнүн атайын кызматы коопсуздукту камсыздоо үчүн бардык күчтөрдү колдонууга даяр экенин билдирди.