УКМК ырайымсыз мамилеси үчүн реабилитациялык борбордун кызматкерлерин кармады (видео)

Бишкекте мыйзамсыз иштеп жаткан "Путь в жизнь" реабилитациялык борборунун бир нече кызматкери кармалды. Бул тууралуу бүгүн, 19-январда УКМКнын маалымат борбору билдирди.

Маалым болгондой, мурда өздөрү дарылануудан өткөн, жогорку медициналык билими жок, реабилитациялык борбордун кызматкерлери жетекчинин көрсөтмөлөрү боюнча жасалма психиатриялык процедураларды жана сүйлөшүүлөрдү жүргүзүшкөн. Ошондой эле бейтаптардын психикалык абалы өтө оор болуп жаткан учурда бекиткичтери бар керебеттерди, дубинка, кыйноочу аспаптардын түрлөрүн, электрошокер, оозун жабуучу каражаттарды колдонушкан.

Мындан тышкары, баш ийбеген бейтаптарды караңгылатылган бөлмөгө камап, 7-8 күн даараткана жана жеке гигиена каражаттарын колдонуу мүмкүнчүлүгүнөн ажыратышкан.

Борбор бир бейтаптан ай сайын 80 миң сом төлөм алып, бирок дарылоо ыкмалары жөнүндө маалыматты эч кимге берген эмес. Мындан тышкары, жугуштуу оорулары бар бейтаптарды бөлбөй, жалпы шартта жайгаштырып, тарап кетүү коркунучунун алдын алган эмес.

УКМК жогоруда аталган мыйзамсыз иш аракеттердин негизинде И.Р., М.Ж., Е.А., М.И., М.В., Т.Ч., К.К. жана Х.С. аттуу жарандарды кармады. Учурда тиешелүү тергөө жана оперативдүү иш-чаралар уланууда.

Борбордон жабыркагандар УКМКнын Чүй облусундагы бөлүмүнө кайрылышса болот. Байланыш үчүн телефон: 0312530301.

Эскертүү: Видео сезимтал адамдарга сунушталбайт!