"Укуктук баа бергиле". Жапыкеевдин Айтматов боюнча айткан сыны парламентте көтөрүлдү (видео) 

Финполдун мурдагы башчысы Сыймык Жапыкеев журналист Эрнис Кыязовдун подкастында Чыңгыз Айтматовдун чыгармаларын сынга алып, аларды "беш тыйындык окуялар" деп атаган эле.

Анын бул билдирүүсү бүгүн, 19-декабрда Жогорку Кеңеште нааразычылык жаратты.

Депутат Гүлшаркан Култаева Илим, билим берүү, инновациялык өнүгүү жана маалыматтык технологиялар, маданият, спорт жана жаштар иштери комитетинин жыйынында Маданият министрлигин жазуучунун элесин коргоого чакырды.

"Руханий мурастын коргоочусу силерсиздер. Ошондой эле улуттук маданияттын коргоочусу да силерсиздер. Эмне үчүн кечээ улуу жазуучубуз, инсаныбыз (ред.: Чыңгыз Айтматов) туурасында социалдык тармактарда баалоо, талдоо болуп жатса унчукпай отурасыздар? Подкасттан биздин жараныбыз Сыймык Жапыкеев улуу инсаныбызга, маданий мурасыбызга баа берип жатат. Сиздер ошонун коргоочусу катары унчукпай отурасыздар. Мен сиздерден талап кылам. Юридикалык баа бериш керек",- деди депутат.

Ал эми маданият министринин орун басары Марат Тагаев министрлик бул жагдайга реакция кыларын айтты.