Казакстанда жаңы парламенттин аталышы "Курултай" деп өзгөртүлүүдө (видео)

Казакстандын президенти Касым-Жомарт Токаев Улуттук Курултайдын жүрушүндө жаңы парламентти "Курултай" деп атоону сунуштап, анын түзүмүнүн негизги параметрлерин белгиледи. Бул тууралуу Kazinform агенттиги маалымдайт.

Маалыматта өлкө башчысы депутаттардын санын көбөйтүүгө зарылчылык жок экенин белгилеп, парламентте чыныгы патриоттор жана жогорку квалификациялуу адистер иштеши керектигин билдирген.

"Жалпы мандаттардын саны 145 болушу керек. Төраганын орун басарларынын саны үч, ал эми комитеттердин саны сегизден ашпоого тийиш", - деген президент.

Токаевдин айтымында, парламенттин жаңы түзүмү мыйзам чыгаруу органынын ишинин натыйжалуулугун камсыздап, өлкөнүн өнүгүүсүндөгү артыкчылыктуу маселелерге көңүл бурууга мүмкүнчүлүк түзөт. Ошондой эле жаңы парламент беш жылдык мөөнөткө шайланат.