Бишкек мэри үй-бүлөсү менен ипотекалык батирде жашай турганын айтты (видео)

Бишкек шаарынын мэри Айбек Жунушалиев учурда үй-бүлөсү менен ипотекалык үйдө жашай турганын билдирди. Бул тууралуу мэр "Кабар" агенттигине берген маегинде айткан.

Анын айтымында, буга чейин ал Кант шаарынан Бишкеккке барып-келип иштеп жүргөн учурда, ага мамлекет тарабынан кызматтык үй берилген.

“Мэр болгонго чейин, министрлер кабинетинин төрагасынын биринчи орун басары кызматын аркалап турганда Канттан барып-келип иштечүмүн. Мэр болгондон кийин да жарым жылдай Канттан келип жүрдүм. Бир жолу мындай окуя болду, жетекчилик чакырганда бир аз кечигип калгам. Канттан келеримди айтканда мага Бишкектен кызматтык үй берилген. Азыр ал үйдү ипотекалык батирге алмаштырып, каражат төлөп келебиз. Ал эми Канттагы үйдү жашабагандан кийин сатканмын. Шаарга толук кандуу көчүп келгенбиз”,- деди мэр.