Чүйдө күйүп кеткен унаадан эркек киши менен 16 жаштагы кыздын сөөктөрү табылды

Чүй облусунун Москва районунда Volkswagen Golf-3 үлгүсүндөгү унаа күйүп кеткен. Анын ичинен 26 жаштагы эркек кишинин жана 16 жаштагы окуучу кыздын сөөктөрү табылганын облустук милициядан билдиришти.

Милициянын маалыматына ылайык, унаа Спартак айылынын чыгыш четинде, көлдүн жанындагы ээн талаадан табылды. Унаа толугу менен күйүп кеткен. Каза болгондор 2000-жылы туулган О.Э. жана жүргүнчүсү Т.С. аттуу 10-класстын окуучусу экени аныкталды.

Кошумчалангандай, айдоочу унааны 11-январда сатып алып, эки күндөн кийин чырактарындагы мүчүлүштүккө байланыштуу электрикке кайрылган. Адис унаанын техникалык абалы начар экенин, зымдардын ачык калганын, салондон бензиндин жыты чыгып, түтүн байкалганын эскерткен.

Учурда тиешелүү текшерүү иштери жүрүп, экспертизалар дайындалды.