Екатерина Биволго козголгон кылмыш иши боюнча сот жыйыны январдын соңунда өтөт 

Бокс боюнча дүйнө чемпиону Дмитрий Биволдун мурдагы жубайы Екатерина Биволго карата козголгон кылмыш ишинин сот жараяны 29-январда өтөт. Ага "эл алдында улуттар аралык кастыкты козуткан" жана "адамдык ар-намысты басмырлаган" деген айыптар тагылган.

Белгилүү болгондой, Санкт-Петербург шаарынын Ленин райондук соту Екатерина Биволдун кыргыздар менен казактар тууралуу айткан видеосу үчүн иш козгоп, чара көрө турганын билдирген.

"Биволдун айткандарына талдоо жүргүзүүгө ылайык, анын билдирүүлөрүндө улуттун тили жана теги боюнча терс баа берилген. Баа берүү кемсинтүү жана уят сөздөр менен коштолгон. Ал жарыялаган материалда адамдарды бир топтон экинчисин артык көрүү айтылган",- деп билдирген райондук сот.

Биволго карата козголгон кылмыш иши боюнча ага ири өлчөмдө айып пул салынышы же административдик камакка алуу чечими чыгышы мүмкүн.

Эске салсак, буга чейин интернет тармагында Екатерина Биволдун ар кандай улут өкүлдөрүнө карата кемсинткен сөздөрдү айткан видеосу тараган.