Бишкекте "Туткун" тасмасынын бет ачары өтөт

Бишкекте 24-январда режисcёр Темир Бирназаровдун "Туткун" толук метраждуу тасмасынын бет ачары өтөт. Бул тууралуу Маданият министрлиги билдирди.

Иш-чара "Ала-Тоо" кинотеатрында өтүп, саат 14:00дө башталат.

Фильмде Улуу Ата мекендик согушта туткунга түшкөн кыргыз жоокери менен немис улутундагы медайым Гретанын тагдыры баяндалат. Согуштан кийин жубайлар Германияда жашап калышат. Башкы каарман өмүр бою мекенине болгон сүйүүсүн сактап, туугандарына кат жазып турат, бирок жооп ала албайт. 43 жылдан кийин келген кат аны чыккынчы катары айыптап, мекенинде эч ким күтпөгөнү белгилүү болот. Бул кат каарман үчүн оор руханий сокку болуп, кийин анын КГБ тарабынан жасалма даярдалганы белгилүү болот.

Иш-чараны “Кыргызфильм” улуттук киностудиясы уюштуруп жатат.