"Евразия" социалдык дүкөндөрү жаш үй-бүлөлөрдү колдоо программасын ишке киргизди

"Евразия" социалдык дүкөндөр тармагы жаш үй-бүлөлөр үчүн жаңы колдоо багытын баштады. Эми бир же бир нече жашы жете элек баласы бар ата-энелер социалдык карта алып, азык-түлүк жана биринчи керектелүүчү товарларды арзандатылган баада сатып ала алышат.

Учурда Бишкек шаарында "Евразиянын" беш социалдык дүкөнү иштеп жатат.

Буга чейин социалдык карталар пенсионерлерге, майыптыгы бар адамдарга, көп балалуу жана толук эмес үй-бүлөлөргө, ошондой эле мугалимдерге, студенттерге жана медицина кызматкерлерине берилчү. Программанын жашы жете элек балдары бар үй-бүлөлөргө кеңейтилиши үй-бүлөлүк бюджетке болгон жүктүн өсүшүнө жооп катары кабыл алынды.

Социалдык картаны "Евразия" паркында жана тармактагы бардык социалдык дүкөндөрдөн алууга болот. Катталуу үчүн ата-эненин биринин өздүгүн тастыктаган документ жана баланын (балдардын) туулгандыгы тууралуу күбөлүк талап кылынат.

"Евразия" социалдык дүкөндөрү мындан ары да калкты жеткиликтүү жана сапаттуу товарлар менен камсыз кылууга багытталган колдоо программаларын кеңейтүүнү пландоодо.