Кыргызстан менен Япония кадр даярдоо маселесин талкуулашты 

Мамлекеттик кызмат жана жергиликтүү өз алдынча башкаруу иштери боюнча агенттиктин директору Элчибек Жантаев Япониянын Кыргыздагы элчиси Хирано Рюити менен жолугушту. Бул тууралуу 22-январда агенттиктин басма сөз кызматы кабарлады.

Маалыматка ылайык, тараптар кадрдык потенциалды өнүктүрүү багытындагы кызматташтыкты, өзгөчө JICA жана JICE менен биргеликте ишке ашырылып жаткан JDS стипендиялык программасынын жыйынтыктарын талкуулашты.

"Долбоордун алкагында магистратура жана докторантура программаларына адистер даярдалып, Япония өкмөтү 399 миллион иен грант бөлгөн. Ошондой эле 2006-2025-жылдар аралыгында Японияда 327 кыргыз мамлекеттик жана муниципалдык кызматкерлери жана “Жаш лидерлер” программасы аркылуу 28 адис билим алган",- деп жазылган маалыматта.

Жолугушууда аталган программанын квотасын 50 орунга, “Жаш лидерлер” программасын 10 орунга чейин кеңейтүү сунушталганы кошумчаланды.