Көрүүсү начар балдардын интернатына 10 жабдык тапшырылды (видео)

Министрлер кабинетинин төрагасы Адылбек Касымалиев Бишкек шаарында жайгашкан Көрүүсү начар жана азиз балдар үчүн атайын жалпы билим берүүчү мектеп-интернатына брайл системи боюнча жазган "Perkins Brailler Classic" үлгүсүндөгү 10 жабдыкты тапшырды. Бул тууралуу мекеменин басма сөз кызматы билдирди.

Маалыматка ылайык, төрага өткөн жылдын сентябрь айында бул мектеп-интернатка барган учурда брайл системи боюнча окутууну уюштуруу үчүн атайын техникага муктаждыгы айтылган. Тиешелүү жабдуулардан 20 даана сатып алууга Резервдик фонддон 3 миллион сомдон ашуун каражат бөлүндү, анын ичинен 10у бул мектеп-интернатка, ал эми калганы Ош шаарындагы мектеп-интернатка берилет.

"Perkins Brailler Classic" жабдыктары окуу процессин уюштурууда маанилүү жана натыйжалуу курал болуп саналат. Алар брайл арибинде жазууну системдүү, ырааттуу жана практикага багытталган окутууга шарттарды түзүп, окуучулардын өз алдынча иштөө көндүмдөрүн, майда моторикасын, концентрациясын өнүктүрөт жана мугалимдердин окуу процессин уюштурууга көмөктөшөт.