Акын, жазуучу Омор Сооронов акыркы сапарга узатылды

Бүгүн, 22-январда белгилүү акын, жазуучу, адабиятчы жана сынчы Омор Сооронов акыркы сапарга узатылды. Бул кабарды Маданият министрлиги билдирди.

Коштошуу зыйнатына маданият министринин орун басары Союзбек Надырбеков, маркумдун жакындары, туугандары, замандаштары, кесиптештери, илим жана маданият өкүлдөрү, акын-жазуучулар, коомчулук катышты.

Ал жерде Соороновдун Кыргыз адабиятына, улуттук маданиятка кошкон зор салымы эскерилип, анын инсандык бийик сапаттары, эмгекчилдиги жана илимий мурасы тууралуу жылуу сөздөр айтылды. Өзгөчө анын көркөм сында, айрыкча адабият таануу илиминде көп эмгектенип, унутта калган акын, жазуучулардын, тарыхчылардын, искусство адамдарынын чыгармаларын, эмгектерин иликтеп, араб, латын ариптеринен азыркы кыргыз тамгасына көчүрүп жарыялаганы баса белгиленди.

Омор Сооронов эмгектери үчүн Эл агартуунун мыктысы наамына жана илим жана техника жаатындагы мамлекеттик сыйлыкка татыган. Маданиятка эмгек сиңирген ишмер наамын алган. Ал эми 2017-жылы III даражадагы “Манас” ордени менен сыйланган.