Бишкекте автобуста аялдын ири суммадагы акчасы жана зер буюмдары уурдалды (видео)

Бишкекте автобуста бара жаткан аял 595 миң сом, 400 доллар акчасын, 100 миң сомго бааланган зер буюмдарын каракчыларга алдыртып койду. Бул тууралуу бүгүн, 22-январда шаардык милициянын басма сөз кызматы билдирди.

Маалым болгондой, шектүүлөр аялдын капчыгын уурдап, белгисиз тарапка качып кетишкен.

Бул факт боюнча Кылмыш-жаза кодексинин 205-беренеси (Уурдоо) менен кылмыш ишин козголду. Натыйжада "Сары-Өзөн" базарынын аймагынан 1985-жылы туулган, мурда оор кылмыштар үчүн соттолгон Ш.М. жана Ж.А. аттуу жарандар кармалышты. Ленин райондук соту чыгарган чечимдин негизинде алар №1 тергөө абагына камакка алынышты.

Шектүүлөр Ш.М. аттуу жаранга таандык Дэу Нексия үлгүсүндөгү унаа менен жүрүшкөн. Аны тинтүү учурунда зер буюмдардын топтому табылды.