Бүгүн Орусия, АКШ жана Украина өкүлдөрүнүн Абу-Дабиде жолугушуусу болжолдонууда

Бүгүн, 23-январда Бириккен Араб Эмирлигинин борбору Абу-Даби шаарында Орусия, АКШ жана Украинанын өкүлдөрү катышкан үч тараптуу жумушчу топтун биринчи жыйыны өтөт. Бул тууралуу Орусия президентинин жардамчысы Юрий Ушаков билдиргенин чет элдик басылмалар жазышууда.

Ушаковдун сөзүнө караганда, орусиялык делегация буга чейин түзүлүп, өлкө башчысы Владимир Путинден так көрсөтмөлөрдү алган. Делегациянын курамына Коргоо министрлигинин жетекчилигинин өкүлдөрү кирип, аны Орусиянын Куралдуу күчтөрүнүн Башкы башкармалыгынын башчысы Игорь Костюков жетектейт.

"Аймактык маселени чечмейинче узак мөөнөттүү тынчтыкка үмүт кылууга болбойт. Орусия атайын аскердик операция учурунда коюлган максаттарына жетүүнү улантат",- деди Ушаков.

Мындан тышкары, Абу-Дабиде АКШ президентинин атайын өкүлү Стив Уиткофф менен Орусиянын Инвестициялар боюнча фондунун башчысы Кирилл Дмитриевдин жолугушуусу өтөт. Алар эки тараптуу экономикалык жумушчу топтун жетекчилери болуп саналат.

Айта кетсек, Кремлде Путин АКШнын өкүлдөрүн кабыл алып, үч сааттык сүйлөшүүлөр жүрдү.