Эмгек министрлиги Орусияга иш үчүн бара турган жарандарга кайрылды

Эмгек министрлиги Орусияга иштөө үчүн бара турган Кыргыз жарандарына кайрылып, айрым эрежелер тууралуу эскертти.

Ага ылайык, мекеме Чет өлкөдө жарандарды ишке орноштуруу борборунун migrant.kg сайты аркылуу Орусиянын аймагына кирүүгө тыюу салынган адамдардын тизмесинде өзүн текшерип көрүүнү сунуштайт.

Ошондой эле Орусиянын мыйзамдарына ылайык, ал аймакта мыйзамдуу жүрүү үчүн төмөнкү милдеттүү жол-жоболорду өз убагында аткаруу зарылдыгын эскертет:

30 күндүн ичинде медициналык кароодон өтүү, мамлекеттик дактилоскопиялык каттоо жана сүрөткө түшүү;
30 күндүн ичинде убактылуу жүргөн жери боюнча аймактык миграция органына миграциялык каттоого туруу.
эмгек келишимин же жарандык-укуктук келишимди түзүү;
90 күндүн ичинде эмгек же жарандык-укуктук келишимдин негизинде убактылуу жүрүү мөөнөтүн узартуу.

Суроолор боюнча жарандар Орусиядагы Кыргызстандын Эмгек, социалдык камсыздоо жана миграция министрлигинин өкүлчүлүгүнө төмөнкү байланыш номери аркылуу кайрыла алышат: +7 996 968 98 97.