Бекхэмдердин үй-бүлөсүндөгү ажырым: Бруклин Бекхэм ата-энесин эмнеге айыптоодо

Дүйнөлүк шоу дүйнөсүндөгү апта атактуу Дэвид жана Виктория Бекхэмдердин тунгуч уулу Бруклин менен болгон ачык жаңжалы менен башталды. Жаш жигит ата-энесин өзүнө кысым көрсөтүп, ашыкча көзөмөл жүргүзүп, жеке жашоосуна өтө көп кийлигишип жатат деп айыптады.

Баары эмнеден башталган

Бул жаңжалдын башаты катары 2022-жылды атоого болот. Дал ошол жылы Виктория менен Дэвид Бекхэмдердин тун уулу Бруклин башка, андан да бай жана америкалык үй-бүлөдөн чыккан кызга үйлөнгөн.

Бруклин Бекхэмдин жубайы Никола Пельтц - америкалык ишкер жана өнөр жай магнаты Нельсон Пельтцтин кызы - Бекхэмдердин үй-бүлөсүнө дароо эле сиңип кете алган эмес. Бул үй-бүлөдө ар дайым жана талашсыз түрдө башкы фигура катары Виктория эсептелип келген. Көп өтпөй эле кайнене менен келиндин ортосундагы мамиле чыңалган деген ушактар тарай баштады. Социалдык тармактардын колдонуучулары үй-бүлөлүк сүрөттөрдү майда-чүйдөсүнө чейин талдап, ким кимге канча жолу лайк басканын санашты. Ал эми таблоиддер Бекхэм-Пельтц жубайларын падышалык сарайдан четтетилген принц Гарри менен Меган Марклга салыштырган чуулгандуу аталыштары бар макалалар аркылуу окурмандарын көбөйттү.

2025-жылдын Рождествосунун алдында бир нече жылдан бери ичтен кайнап келген бул жаңжал кайрадан күч алды. ЖМКлар Виктория менен Дэвид Бекхэмдер тун уулу Рождествону Пельтцтин үй-бүлөсү менен тосорун жарыялагандан кийин, аны социалдык тармактан өчүрүп салышканын байкашкан. Бруклиндин иниси Круз ата-энесин коргоп чыгып, Бруклин өзү апасы менен атасын бөгөттөп койгонун, ал эми үй-бүлө эч кимден жазылуусун токтотпогонун айткан.

Акыры 20-январда Бруклин Бекхэм чыдабай, ачыкка чыкты. Instagram социалдык тармагында ал узун пост жарыялап, ата-энеси менен болгон ажырым тууралуу кептерди ырастаган. "Мен жылдар бою унчукпай, жеке маселелер жеке бойдон калсын деп колдон келгендин баарын кылдым. Бирок ата-энем жана алардын айланасындагылар ЖМКлар менен сүйлөшүүнү токтотпой жатышат. Ошондуктан мага чындыкты айтуудан башка жол калган жок", - деп жазган Бекхэм.

Бруклиндин айтымында, үй-бүлөнүн сырттан караганда биримдиктүү көрүнүшү жана бири-бирин ашкере колдогондой жасалган мамилеси өмүр бою эл үчүн коюлган оюн гана болгон. Чыныгы жашоо социалдык тармактардагы кооз сүрөттөрдөн таптакыр айырмаланган.

"Бул үй-бүлөдө “сүйүү” социалдык тармактарга канчалык көп пост чыгарасың жана баарын таштап коюп, жалпы сүрөткө түшүүгө канчалык тез чуркайсың - ошол менен өлчөнөт", - деп жазды ал.

Бруклин Бекхэмдин ата-энесине нааразычылыгынын чыныгы себеби

Бруклин Бекхэмдин ата-энесине болгон дооматынын тамыры 2022-жылдын апрелинде Никола Пельтц менен болгон үйлөнүү тоюнан башталат. Бруклиндин айтымында, ата-энеси тойдун даярдыгына кийлигишип, абалды көзөмөлдөөгө аракет кылышкан.

Виктория Бекхэм өз модалык бренди аркылуу келинге үлпөт көйнөк жасоого сөз берген, бирок аз убакыт калганда убадасын аткаруудан баш тарткан. Натыйжада Николага тез арада альтернатива издөө зарыл болгон.

Тойго бир нече жума калганда ата-энеси Бруклинге юридикалык шарттарды күчтөп талап кылып, фамилияга болгон укуктардан баш тартууга кол коюшун талап кылышкан. Той алдында, Бруклиндин айтымында, үй-бүлөнүн мүчөлөрү ага Николаны "биздин каныбыз эмес" жана "биздин үй-бүлө эмес" деп айтышкан.

Эң оор учур, Бруклиндин айтуусу боюнча, өзү менен жубайынын биринчи бийи учурунда болгон. Николанын ордуна сахнага Виктория чыга калып, жаштардын боло турчу бийин бузган.

Бул окуялар үй-бүлөдөгү чыңалууну күчөтүп, коомчулуктун көңүлүн бурган.

Бекхэмдердин уулунун тоюнда чындыгында эмне болгон

Адегенде той көйнөгү тууралуу. Азыр Бруклин Бекхэм апасы акыркы учурда келинине өз брендинен көйнөк берүүдөн баш тартканын айтууда. Бирок 2022-жылы Никола Пельтц Grazia журналына берген маегинде таптакыр башкача билдирген. Анын айтымында, ал Викториянын көйнөгүнөн өзү баш тартып, Valentino брендин тандаган. Дал ушул чечими келечектеги кайненесинин ачуусун келтирген.

Андан ары. Тойду сүрөткө тарткан фотограф Герман Ларкиндин айтымында, Виктория Бекхэм Николадан "уурдап алган" деп айтылып жүргөн бий башынан эле күйөө бала менен апасынын бийи катары пландалган. Бул тууралуу "Антиглянец" телеграм-каналы жазат. Ларкин "Антиглянецке" берген маегинде Пельтц тойдо чындап эле ыйлаганын, бирок бул бий "уурдалгандыктан" эмес, алып баруучунун - Марк Энтонинин - сөздөрүнөн улам болгонун айткан. Ал баарынын көзүнчө Виктория Бекхэмди залдагы эң сулуу жана эң таасирдүү аял деп атаган. Бул, балким, чындык болушу мүмкүн, бирок той учурунда, келиндин көзүнчө, күйөө баланын апасын сулуулуктун жана аялзатынын идеалы катары мактоо орунсуз жана жагымсыз угулган.

Ларкиндин айтуусунда, Виктория тууралуу ошол сөздөрдөн кийин ыйлап жиберген Пельтц залдан чыгып кеткен. Бирок Бруклин дароо эле жубайын сооротууга шашкан эмес - алгач апасы менен бийди аягына чейин бийлеп бүтүргөн.

Ларкиндин сөздөрүн Никола Пельтц өзү да Grazia журналына берген маегинде ырастаган. Бирок ал алып баруучунун жагымсыз сөздөрү - бул импровизация эмес, атайын алдын ала пландалган, Виктория Бекхэм тарабынан ага багытталган "ийне сайуу" болгон деп эсептей турганын кошумчалаган.

Эгер тойго келген коноктордун колунда телефон болгондо, окуялардын так чынжырын калыбына келтирүү алда канча жеңил болмок. Бирок салтанаттын башында эле бардык гаджеттер жеке баштыктарга салынып, аларды колдонууга жана видео тартууга мүмкүн болбой калган. GB News басылмасынын маалыматына ылайык, бул тойго катышуунун эрежеси болгон.

Белгилүү болгондой, той өзү да бир топ чуулгандуу өткөн. Пельтцтердин үй-бүлөсү салтанатка 3 миллион фунт стерлинг короткон. Андан кийин уюштуруучулар менен ачык жаңжал чыгып, эки тарап бири-бирин сотко берген. Уюштуруучулар болсо ЖМКларга келин тараптан болгон көптөгөн чыргоолонуу, эркелөө жана "бул гүлдөр жетиштүү ак эмес" деген өңдүү дооматтар тууралуу айтып беришкен.

Той болгондон көп өтпөй эле жаш жубайлар дагы бир жолу - "азыраак стресстүү" - той өткөрүүнү каалашарын билдиришкен. Алар муну бирге түтүн булаткандарына үчүнчү жыл болгондо ишке ашырышкан. Бирок бул салтанатка Бекхэмдер чакырылган эмес.

Эмне үчүн муну баары талкуулап жатат жана Бекхэмдердин өзү эмне дейт

Карап көрсөң, бул жерде чыныгы жаңжал барбы деген суроо жаралат. Качандыр бир кезде тойдо бир нерсени бөлүшө албай калышкан, келин менен кайнененин мамилеси анча жылуу эмес, анан да алар эл алдында жүргөн адамдар, сүрөткө түшүү, кандайдыр бир образ жаратуу - бул алардын ишинин бир бөлүгү. Буга ушунчалык жабышуунун эмне кереги бардай сезилет. Жалпысынан алганда, адаттан тыш эч нерсе жоктой.

Бирок "ата-эне менен бала", андан да ашып "кайнене менен келин" деген тема баарынын жанын козгогон маселе экени белгилүү. Ошондуктан коомчулук бул үй-бүлөлүк тарыхка кызыгуу менен сүңгүп кирип, бат эле эки жаатка бөлүндү: бир тарабы Бекхэмдердин улууларын колдосо, экинчиси - кичүүлөрүн жактай баштады.

Ата-энени жактагандар Бруклин Бекхэмди эрке өскөн, бай үй-бүлөнүн баласы, өзүн дайыма издеп жүргөн "мажор" катары көрүшөт. Алардын ою боюнча, ата-энесинин катуулугун же манипуляциясын күнөөлөө - таң калычтуу жана жөн эле жакшылыкты билбегендик. Анткени дал ошол ата-эненин мүмкүнчүлүктөрүнүн аркасында Бруклин өзүн издөөнү мынчалык "кооз" жана ыңгайлуу шартта жүргүзө алган.

"Эркелетилип чоңойгон, инфантилдүү кичинекей адам. Ал эч нерсе жараткан эмес, бир да күн чыныгы эмгек менен иштеген эмес жана атасы жылдар бою ден соолугун курмандыкка чалып тапкан статус менен жашоо деңгээлине бир мүнөт да татыган эмес", - деп жазышууда блоггерлер.

"Силер мени эч качан Бруклин Бекхэм ата-энесинин курмандыгы экенине ынандыра албайсыңар, айрыкча ата-энеси анын фотографияга болгон кызыгуусун толугу менен каржылап турганда…" - деп X (мурунку Twitter) колдонуучусун The Express Tribune келтирет.

Бруклинди жактагандардын бир бөлүгү, элдин көз алдында жашаган мындай үй-бүлөдөгү атмосфера уулду ата-энесине каршы койбой койбойт деп эсептешет.

Бул чуулгандуу окуяга Виктория Бекхэм да, Никола Пельтц да азырынча комментарий бере элек. Үн каткан жалгыз адам - Дэвид Бекхэм болду, ал да этият, философиялык маанайда. The Guardian басылмасынын жазышынча, ал уулунун сөздөрү менен жүрүм-турумун "жаштыктын катасы" деп атаган, бирок ошол эле учурда "балдарга ката кетирүүгө уруксат берилет" деп кошумчалаган. Уулунун постунда айтылган конкреттүү айыптоолорго Дэвид Бекхэм жооп берген эмес.